Eserden Örnekler

Terceme-i Mehmed Rüşdi Paşa Müşarun ileyh serhadd-i Erzurum’da Sancak-dar Ali Efendi derler bir merd-i dilirin sulbünden pa-nihade-i muhayyem-gah-ı vücud ve alem-tiraz-ı alem-i şuhud olup, vasıl-ı derece-i rüşd ü seddad ve nail-i nakdine-i istidad oldukda, biraz eyyam vüzera dairelerinde Enderun Ağalığı hidmetinde pa-ber-cay-ı kıyam olduktan sonra saika-i Tevfik ile bazı ashab-ı kulübün nazar-ı iksir-eserine mazhar ve Nazm: Kalem gufta ki men şah-ı cihanem, Kalem-zen-ra be-devlet mi-resanem. keşidesini ser-meşk ü ezber ederek, edevat-ı fenn-i kitabeti mehma-emken tahsilde ikdam etmekle, bazı vülat-ı kiram yanlarında Mektubcu Yamağı ve Kethuda Katibi olarak suleha-yı vüzeradan Anapa Muhafızı Ferruh Ali Paşa’ya intisab ve müddet-i vafire Divan Katibliği’yle güzarende-i eyyam-ı şebab ve iltimas-ı müşir-i müşarün ileyh ile silkü’l-le al-i tarik-i Pertev-refik-i haceganiye insilake dahi fursat-yab ve ol vezir-i Pakize-zamirin irtihalinden sonra Asitane-i feyz-aşiyaneye intikal birle Cezayirli Vezir-i dilir Hasan Paşa merhuma kapudanlığı hengamında Divan Efendisi olup, hazar u seferde müsteşar u mütemini olmağla, beyne’l-etrab şöhret-yab olmuşidi. Müşarun ileyh vefat etdikte, ol esnada orduda Kethuda-yı Sadr-ı ali bulunan Hakkı Paşa merhuma Kethuda ba’dehu Dağlı Vakasın’da Nüzül Emaneti’nde vesair hidemat-ı haceganide kullanılarak Mısır mu’askerinde dahi zahire hususiyle Ebuhur ve Akka’da ve bi’l-iktiza Banaborta tarafına elçilikte istihdam ve Yusuz Ziya Paşa merhum bazı hususdan dil-gir olup, ordu-yi merkumdan Sakız Ceziresi’ne menfiyyen izam olunup ve çend mah mürurunda, Rikab-ı şahanede bazı hamileri recasiyle ıtlakla [...] (Yılmazer 2000: 69).