Eserden Örnekler

Ez-zâğ-ı hezâr bülbülî bih

Ez-hırmen-i sad giyeh-i gülî bih

Mahzen-i esrâr-ı Hudâ, cenâb-ı Mevlânâ altı yüz dört târîhinde Rebî‘ü’l-evvelin altıncı gününde Belh’de dünyaya geldi. Nâm-ı nâmîleri Muhammed Celâlüddîn-i Rûmî’dir. Neseben azîz, şerîf idi. Silsile-i âlîleri pederi cihetinden Ebâ-Bekr-i Sıddîka peyveste, anne cihetinden Hazret-i Alî’ye müntehîdir. Vâlidesi de Belh emîrinin kerîmesi idi. On sekiz yaşlarında pederi Muhammed Bahâuddîn ile Lârendeye geldi. Nişâbûr’da ekâbir-i sûfiyyeden Ferîduddîn Attâr’ın teveccühü kazandı. Ulûm-ı âliyye ve âliyyeyi tahsîl edip az bir zamânda müşârun bi’l-benân oldu. Er oğlu er olduğunı isbât etdi. Seyyid Şerefüddîn-i Semerkandî’nin duhter-i pâkîze-ahteriyle izdivâc eyledi. Te’ehhülünden altı yıl sonra pederiyle berâber Konya’ya hicret buyurdu. Bir müddet ulûm-ı mütenevvi‘a nesşriyle meşgûl oldu. Çok talebe yetişdirdi. Mü’ehhiren sultânu’l-ulemâ mürîdânından Seyyid Burhânuddîn-i Muhakkik-i Tirmizî delâletiyle meslek-i sûfiyyeye sâlik oldu. Ulemâya mahsûs olmak üzere tarîkat-ı ‘aliyye-i Mevleviyye’yi te’sîs eyledi. (Ali Haydar 1306/1888: 2).