Eserden Örnekler

Kelimât-ı Pîrân

Bismi’llâhi’r-rahmâni’r-rahîm

El-hamdüli’llâhi Rabbi’l-âlemîn ve’s-salâtü ve’s-selâmü alâ-rasûlinâ Muhammedin ve âlihi ve sahbihi ecma’în. Serdâr-ı memleket-i Rabbânî serdâr-ı hakâyık-ı Sübhânî vâkıf-ı ma’ânî-i dekâyık ârif-i envâr-ı nübüvvet pîrân-ı esrâr-ı hakikat envâr-ı çeşm-i cihân kümmel-i sâhib-i zamân olan mahbûbân-ı hazret-i Hudâ makbûlân-ı cenâb-ı Kibriyâ kaddesa’llâhu esrârehüm hazerâtının nefes-i nâtıka-i Rahmâniyelerinden sâdır olan kelimât-ı kudsiyelerini nice e’imme-i kümmelînin tahrîrâtlarından ahz ü cem’ine bi-inâyeti’llâhi'r-Rahmân ve meded-i rûhâniyet-i pîrân kıvâm u ihtimâm gösterildi ki kırâ’at buyuran tullâb-ı âşıkân ve perhîzkâr-ı sâlikân hazerâtları sülûklarında taleb-i aşk-ı riyâzet ve ra’-ı hubb-ı riyâsetlerin müzdâd eylediklerinde bahr-ı fenâda esmâ ve sıfâtın kesret-i ta’ayyünâtından tecrîden sırr-ı lî-ma’a’llâh beşâreti ufk-ı rubûbiyetinden tulû’ ile esrâr-ı zât-ı ma’ânînin hakâyık-ı cem’ü’l-cem’i dâ’iresine vaz’-ı kadem buyurduklarında bu fakîr-i dil-rîş Hâs İbrâhîm Dervîş-i derdmendi peygûle-i hâtır-ı pür-ma’ârif-i ma’ânîlerinde tard u ib’âd buyurmayup yâd buyurulmak temennidir cenâb-ı Hakk ve Feyyâz-ı mutlak bu Risâle-i Kelimât-ı Pîrân’da mezkûr olan meşâyıh-ı kibâr ve e’ızze-i kâmilü’l-ayâr kaddesa’llâhu esrârehüm hazerâtlarının (1b-2a) … Şeyh Ebû Bekr Vâsıtî kaddese sırrahu İbn Fergânî dimekle ma’rûfdur ana İmâm-ı şark dirler idi ulûm-ı zâhiri ve bâtını câmi’ idi Merv’de ârâm eylemişdir anda dünyâdan gitmişdir kabr-i şerîfi dahı Merv’dedir meşhûr-ı ma’rûfdur ferîd-i zamâne idi ol yine bir dahı buyurdı ki İyyâküm ve lezzâti’t-tâ’ati fe-innehu semûmün kâtiletün ya’nî ihtirâz ediniz tâ’âtlerin lezzetleriyle memkûr olmakdan ki ol lezzet helâk idici zehr-i kâtildir. Şeyh Emîr Seyyîd Alî bin Şihâb bin Muhammed el-Hemadânî kaddese sırrahu ulûm-ı zâhiri ve ulûm-ı bâtını câmi’ idi Şeyh Şerefüddîn Mahmûd bin Abdu’llâh el-Merzukânî’nin halifesidir ammâ kesb-i tarîkati sâhibü’s-sırr Takiyüddîn Alî Dostî’nin önünde eylemişdir çok kitâb tasnîf eylemişdir Şerh-i Füsûs ve Şerh-i Kasîde-i Hamriyye-i Fârizıyye ve Şerh-i Esmâu’llâh ve Şerh-i Kitâb-ı Esrâru’n-Nokta gibi bunlardan gayrı te’lîfâtı çokdur … ol buyurmuşdur ki bu tâ’ife-i celîlenin üzerlerine farzdır meşâyıhı ziyâret etmek ve anların hizmetlerinde dâ’im ü kâ’im olmak (67a-b). İbrâhîm Hâs, Risâle-i Kelimât-ı Pîrân, Süleymaniye Kütüphanesi, Hacı Mahmud Efendi Bölümü Yazmaları Nr: 4643.