Eserden Örnekler

Nesr

Pâdişâh-ı mülk-ârāy zıllullâh-ı ḫurşid-rây bânî-i mebânî-i cihânbânî mâh-ı evc-i ‘âlem-gîrî vü kişver-sitânî şâh-ı Sikenderdür ḫaḳan-ı Ferîdûn-fer sulṭânü’l-maşrıkîn ve’l-maġribîn hâdimü’l-Haremeyni’ş-şerîfeyn mâhî’ü’l-küfr hâmî’ü’l-İslâm kâtilü’l-mülâhadati’l-li΄âm kâsirü’l-ekâsiret kâṣımu’l-ḳayâsıret e’s-sultân ibnü’s-sultân ibnü’s-sultâni’s-sultân Ahmed Hân  ibnü’s-sulṭân Muhammed Hân ibnü’s-sulṭân Murâd Hân meddu’llâh Te‘âlâ  zılâl-i devletü’l-zâhireti’l-bâhiret ‘alâ mefâriki’l-müslimîn ilâ inkırâzi’z-zamân  tetebbu‘-ı ketb u resâ΄il iden ashâb-ı dâniş ve erbâb-ı dile rûşendür ki  sâlik-i mesâlik-i te΄lîf ü tasnîf olanlar bir pâdişâh-ı sa‘âdet-penâh  yâ ekâbir-i devletden bir ṣâhib-i câhun ki nâmını ünvân-nâme iderler  evsâf-ı şâmile vü ‘âmme ile medhinde ıtrâ ve vasfında mübâlagalar ile  teksir-i sevâd u tevfîr-i imlâ vü inşâ΄ iderler bu abd-ı fakîrün hâtır-ı fâtırına  bu hutûr ider ki izzetlü pâdişâh-ı felek-destgâhun hasâ’is-i evsâf-ı cemîlesi ki hazret-i Bârî zât-ı melekî-simât melikî sıfâtlarını  anunla gayrilerden mümtâz u ser-efrâz itdügi vâḳi‘-i ḥâl ve muvafık-ı nefsü‘l-emr idügi cây-ı makâl degüldür. Ol ni‘am-ı ilâhiyyenün ba‘zını zikr ile edâ-yı şükr idem ve min Allâhi’t-tevfik el-ni‘meti’l-evveli.  Evvelki ni‘met-i celîle budur ki: Hilâfet-i uzmâ vü emânet-i kübrâyı Ḫudâ-yı te‘âlâ ol zîver-i tâc u taht ve ol sâhib-kırân-ı hümâyûn-baht  hazretlerine bî-ta‘b u meşaḳḳat âbâ-yı kirâm vü ecdâd-ı izâm belki sâ΄ir mülûk-ı mâziye vü selâtin-i sâlifeye virdügi zamândan mukaddem  inâyet buyurmagıla cümleden mümtâz ve cemî‘inden ser-bülend ü ser-efrâz  itmişdür. Hakkâ ki özge ni‘met-i celîledür. Kuvvet-i isti‘dâd u kemâl-i sedâd  zât-ı huceste-nihâdlarına delâlet ider. Bu bende-i kemîne bir nazm-ı dil-pezîrlerine  küstâhâne tetebbu‘ itdükde bu beyt ile ol isti‘dâd-ı ezeliye işâret  itmiş idüm. (Özçam 1999: 175).

Mesnevî

Hudâvendâ Kerîmâ Kirdgârâ

Rahîmâ Kâdirâ Perverdigârâ

Şeh-i devrâna virdün bunca ni‘met

Serîr-i saltanat tâc-ı hilâfet

Mu‘în itdün anı şer‘-i mübîne

Mü΄eyyed eyledün dîn-i metîne

Çün itdün şer‘i anunla mü'eyyed

İlâhî devletin eyle mü΄ebbed

Anı hıfz eylesün yâ Rab melekler

Murâdı üstine dönsün felekler

Melikdür halkla ammâ melekdür

Mu‘allâ dergehi reşk-i felekdür (Özçam 1999: 180).