Eserden Örnekler

Mihr ü meh kim ‘âlemi eyler münevver rûz u şeb

Yanmada gûyâ iki mısbâh-ı enver rûz u şeb

Tâbelenmiş iki zerdür gûyiyâ bu mihr ü meh

Kim anı kîse-i kebûd-çarh saklar rûz u şeb

Derd-i serden deste almış mihr ü meh nîlûferin

Gerdiş itmiş çarhun ahvâlin mükedder rûz u şeb

Sâ‘at-i çarha iki şâkûldür bu mihr ü meh

Birisi anun çıkar birisi iner rûz u şeb

Çarh dervîş oldı gûyâ mihr ü mehden tâcına

İki gül dikmiş döner şevk ile muztar rûz u şeb

Mâder-i çarha iki pistân olmış mihr ü meh

Şîr ile nev-kûdegân-ı dehri besler rûz u şeb

Hücre-i çarh içre mihr ü mâh iki sofradur

Nûrla it‘âm ider halkı ser-â-ser rûz u şeb

Keffelerdür mihr ü meh ‘attâr olmış âsmân

Pîş-i mîzânında dirhemlerdür ahter rûz u şeb

Mihr ü meh çün kâse-i zerrîndür sâkî-i çarh

Rind-i mey-nûşa virür mânend-i sâgar rûz u şeb

Zûr-bâz-ı çarh almış destine mihr ü mehi

Gûyiyâ birin atup birini dutar rûz u şeb

İki zerrîn levhdür âmâde olmış mihr ü meh

Tâ ola na‘t-i Nebî anda muharrer rûz u şeb

Şem‘-i eyvân-ı hüdâdur zât-ı pâki mihr ü meh

Olmada pervâne-i nûr-ı Peyember rûz u şeb

Mihr ü mehden rütben ‘âlîdür dokunmaz pertevi

Nice rûy-ı arza sâyen vire zîver rûz u şeb

Mihr ü meh zulmet-zidâ-yı levha-i eşbâh ise

Nûrun eyler safha-i ervâhı enver rûz u şeb

Mihr ü meh çün kâgıd-ı memhûrdur cerrâr-ı çarh

Anı pîş-endâz idüp lutfun ider cer rûz u şeb

.......

(İstanbul Üniversitesi Nadir Eserler Kütüphanesi 5537. vr 151b-152a; Delican 2014:67-69)