Eserden Örnekler

Ve mâh-ı mezbûrun onunda serdâr-ı mu‘azzam serdârlık hil‘ati geyüp ve hazretlerine virilen kaftân Sigetvar’a dâhil olduğı gün Gâzî Sulṭân Süleymân Hân-ı cennet-mekânun geydüği ağır kaftân olup ve otaklar dahi ol sefer-i feth-müncerrde ẕât-ı hümâyûnlarına kurılan otaklar olup ve ana göre sâyir kaftânlar ve kılıçlar ve cebehâne ve kırk bin flori nakd in‘âm ve birkaç katâr deve ve katır ve birkaç ṭavîle atlar ve murassa‘ raht ve eğer ve mücevher ‘abâyîler ihsân buyurılup ve fark-ı şerîfe mübârek dest-i hümâyûnla murassa‘ sorkuç dakınup hayr du‘âlar ile yollandılar. Ve Sarây-ı ‘Âmire’den çıkup ṭabl ü ‘alem ve hayl ü haşem birle uğur açup yüridi. Ve iskelede kadırgaya dâhil olduklarında sa‘âdetlü pâdişâh-ı ‘âlem-penâh Rûmili beğlerbeğisine vezâret ve anun yerine yeniçeri ağasına ve ağalık içerüde hâssa silahdâr ağaya virildüğin bi’ẕ-ẕât sadr-ı a‘zam söyleyüp hâzıru’l-vakt olanlar dahi el öpdiler. Ve Yemen Beğlerbeğisi Hasan Paşa’ya dahi yarındası vezâret virilüp kılıç ve kaftân irsâl olındı. Ve Anaṭolı Defterdârı Hüsrev Beğ sadr-ı a‘zam hazretleriyle sefer-i hümâyûna me’mûr olup gitdiler. Ve Üsküdar Kâḍîsı ‘Arab-zâde Efendi dahi refîk-ı ṭarîk oldılar. Ve re’îs efendi küttâbla bile varup mâh-ı mezbûrun evâhirinde göçüp müteveccih oldılar. Ve Bosna’dan ma‘zûl Ferhâd Paşa dahi gelüp sâyir ma‘zûl beğlerbeğilerle sefere revâne oldılar (Mücmelü't-Tûmâr. Londra nüshası vr. 204b/16-205a/15).