Eserden Örnekler

I

İzzetlü rifʻatlü birâder-i nîkû-manzarım Süleymân Çelebi Hazretleri

Âmed-şüd-kede-i perî-rûyân-ı safâ olan ikâmetgâh-ı nezâhet-destgâhlarına şükûfezâr-ı icâbetde bûyâ gül-i rengîn-i sad-berg-i duʻâ ser-şîşe-i pîrâ-yı çarh-ı mînâ kılındığı beyânında nümâyendegî-i mâ-fi’z-zamîr-i muhlisî budur ki münʻakis-i mir’ât-ı tabʻ-ı musaffâları oldığı vech üzre müşâhede-i likâ-yı küdûret-fersâları tahrîk-i şâh-bâl-i müjgân ve itâre-i hammâm-ı nigâh-ı hasret-nişân etmekle misâl-i tûtî-i şekker-leb sühan-perver-i semâʻ-i nâtıka-i sohbetin gözümde uçar. İnşâallâhu teʻâlâ vü tekaddes tâvûs-ı mülammaʻ-bâl-i zümürrüdîn-âşiyân kenâre-i cûy-ı şîr-i tebâşîr-i subhgâhda hırâmân ve dâne-çîn-i kiştzâr-ı lü’lü’-i erzen-i âsumân oldığı zemân çemen-suffa-i mülâkâtda halka-bend-i istînâs ve sâha-i cennet-pîrâ-yı muvâlâtda tarh-ı esâs-ı mebânî-i ʻadîmü’l-indirâs kılınmak mersûm-i sahîfe-i âmâlimizdir. El-fakîr Mustafâ Sâmî.

2

İzzetli rûhum Süleymân Çelebi huzûrlarına tahiyyât-ı sâfiye ve teslîmât-ı vâfiye ihdâsından sonra inhâ olunur ki mektûb-ı belâgat-üslûb ve beşâret-mahsûbunuz vusûl bulup mefhûmı maʻlûm oldı. “Tenâkehû tenâselû” kelâm-ı küllîsinin mebâdîsi müşaʻʻar oldığı kâʻide-i şerʻ-i mutahharı icrâda tasavvur-ı merâm üzre ihtitâm müyesser olmuş, makâsıd-ı kelâm mûcib oldığı teselsül ve tenâsüle dahı Bârî teʻâlâ hayr-tevfîkin karîn edip müsevvere-i küllîyye-i te’ehhülün cüz’-i evlâsından rû-nümây-ı mücellâ-yı zuhûr olan sûr-ı sürûr-ârâ gibi şatr-ı uhrâda dahı mûcibe-i külliyye-i tevâlüdi intâca ve tekmîl-i meserret-i izdivâca mazhar olmağla tasdîk-i müddeʻâ-yı recûliyyete muvaffak olasız. Mâ fi’d-duʻâ. (Sâmî (yz) 114a-114b).