Eserden Örnekler

Bizim Halîl’in Gönderdiği Kâğıdın Cevâbında İrsâl Eylediğim Mektûbun Sûretidir. Sene 1136/1723-24

Ba’de’d-du’â oğlum Halîl Halîfe huzurlarına selâmlar olunur mektûbun gelüp vüsûlü müyesser oldu ne hâldesin ve ne âlemdesin derd-i aşkla sûzân oldun mu ve hicr-i cânân ile nâlân oldun mu dîde-i bîdârın pür-hûn mudur ve müşâhede-i dîdâr ile meftûn oldun mu bunlar murâd-ı maksûd değildir belki fitne-i azîmedir bu fitnelerden halâs olamazsın bunlara (1b) fenâ virüp tâ kendüne gelmedikce ve bu menzili anlamağa sa’y gerekdir anlayagör anladıkda anlarsın evvelen birkaç yavru çıkdı dimişsin ve hâllerin tefahhus etmişsin gerekdir ki yavruların üzerlerinden eksik olmayasın eğer bir dem yavruların üzerlerinden eksik olursan yavrulara soğuk kâr idüp donarlar zîrâ havâ soğukdur helâk olurlar helâke sebeb olmayasın ve dahı âşiyâneden taşra yol vermeyesin sonra yabanî olurlar âşiyâne dediğim hudûd-ı şerî’atdir ve ayaklarına köstek vurmak gerekdir ki hattâ taşra gözetmeyeler ve kösteği yavruya göre vurasın eğer büyük yavruya küçük köstek vurursan yavrular kösteği kırar ve dilediği yerde güzer ederler (2a)…

İrsâl olunan mektûb ile ilâhiyâtımızın evvelki cild-i evveline tahrîr eylediğim nazm irsâl olunmuş idi bu def’a ikinci cildinin evveline yazılan nazm derûn-ı varaka ile teberrüken irsâl olunmuşdur vüsûlü haberinden memnûn olunur benim karındaşım gerek bu varakanın kelâmlarından ve gerek bu nazmdan hâtır-ı şerîfe bir gubâr gelmeye bunlardan garaz-ı kâlâ mülâhaza buyurulmaya hemen cenâb-ı sa’âdete muhabbeten ve meveddeten irsâl olunmuşdur ma’lûmunuzdur ki çoklar vardır ki kelâmı işidir anlamaz ve çoklar vardır ki ne işidir ne dinler ve çoklar dahı vardır ki işitmeden anlar anlamayana kelâm olmaz su’âlinize mertebe-i Yumrî bugün birkaç kelâm tahrîr olundu ve dahı benim karındaşım eğer mukadder olur ise Kastamonî’de ser-defter-i evliyâ hurşîd-i asfiyâ hazret-i Pîr Sultân Şeyh Şa’bân Efendi kaddesa’llâhu sırrahü’l-azîz hazretlerinin âsitân-ı sa’âdetlerinde seccâde-nişîn olan ârif-i esrâr-ı lâhûtî ve câmi’-i hakâyık-ı nâsûtî hazret-i Şeyh Muhammed Efendi hazretlerine fâkîrâne ve hakîrâne selâmımı teblîğ buyurmanız mercûdur ve ârif-i esrâr zübde-i ebrâr Azîz-zâde Efendi’ye dahı selâmımı teblîğ buyurasız. Sene 1156/1743-44 İbrâhîm el-Hâs (38a-b). (Mektûbât-ı İbrâhim Hâs, Bayezıd Devlet Kütüphanesi Nr: 3650).