Eserden Örnekler

Ey mahzen-i fezâîl     Ey vech-i Hakk’a mazhar

Ey mecma’-ı hasâîl    Mecmû’-ı halka rehber

Halkın kamudan evvel     Hulkun ‘azîm ü efdal

Rûhundur asl-ı evvel     Cismin kamudan enver

Ey zulmetin ziyâsı    Ey hastalar şifâsı

Ey gamlular safâsı     Lütfun sayar mı diller

Cismündedür şerî’at  Rûhundadur tarîkat

Sırrın hüve’l-hakîkat    Ey çâr-ı ilme mazhar

Ey Mustafâ-yı Rahmân     Ey murtazâ-yı insân

Ey muktedâ-yı her cân     Ey sırr-ı rûh-ı peyker

Kânûn-ı dîn-i vâdı’     A’lâm-ı ilm-i râfi’

Ey her belâyı dâfi’     Aşk-ı Hudâ’da dilber

Ey ‘âlemîne rahmet        Nûr-ı hüdâ-yı ümmet

Ey reh-nümâ-yı vuslat     Her ‘izzete sezâ-vâr

Olunca rûz-ı mahşer    Nefsî okuya her ser

Tutula cümle diller     Ancak şehâ o söyler

Aşkınla döner eflâk    Nûrunla kil olur hâk

Biter senünle her çâk    Ey her şikeste şeh-per

Kapunda cümle sâ'îl    Bağladı sana mühmel

‘Arz ide geldi müşkil    Cümle velî peyamber

Ey mevc-i bahr-i bî-‘add    Sırr-ı vücûd-ı ebced

Mürseller içre Ahmed    Ey cümle başa efser

Âşık ana Zelîhâ    Sana cemî’-i  eşyâ

Belki Hudâ Te'âlâ    Ey enbiyâya muhtar

Ey mücrimîne eşfe’    Fazlın dürer-i matma’

Ey mihr-i gayra matla’    Ey mihr ü mâh-ı çâker

Yâ seyyide’s-seriyye    Ya eşrefe’l-beriyye

Yâ mülbise’l-’ariyye    Kassâm-ı havz u kevser

Yâ mu’tîe’l-mevâhib    Ya mürşide’l-merâtib

Yâ fâtihe’l-metâîb    Halk-ı cihâna manzar

Olmasa idi nûrun    Hüsni olmazdı hûrun

Ey aslı her sürûrun    Cümle safâya masdar

Görmezse bunda rûyun   Görmez haşırda bûyun

Dutmasa güft u gûyun    Yoldan azar melekler

İlmin kadar  İlâhî    Ta’zîm kıl kemâhî

Ol nûr-ı mihr-i mâhı    Her demde kıl münevver

Eshâb-ı necm-i hâdî    Bulsun biküllî nâdî

Rıdvân ile murâdî    Olınca rûz-ı mahşer

Bir katre ana kâfî    Belki cihâna vâfî

Yâ şâfî yâ mu’âfî    Hüsnündür ey şefâker

Ey cümle baş tâcı    Zerrin cihân harâcı

Şeyhî düşüpdür aci    Aci keder etmek ister (Süleymaniye Kütüphanesi, Şehid Ali Paşa 2759/4, vr. 33-36)