Eserden Örnekler

İkinci Bâb

Semâ’ın İbâhati Beyânındadır.

Ey azîz ma’lûm olsun ki, hakîkat- i semâ’ taab-I vakitten rahat taleb etmekliktir. Ve gumûm-i ahvâlden teneffüs etmekliktir. Pes bu semâ’ın ibâhati üzere biz delâil zikr ederiz. Ondan sonra semâ’a münkir olana cevâb veririz. Ve semâ’ın ibâhatine delîl eǧer ki kelâm-ı sikâttan ve kütüb-i mu’teberâttan ve mutavvelâttan çok kelâm oldu. Lâkin etfâl-i şerîatin fehmine lâyık olmadı.

Pes ben murâd eyledim ki, bunda alâ kânûni’ş-şer’ cevâb verem. Pes ben îrad eyledim evvelâ sikâtın ibâhat-i semâ’da olan kavillerini ve ol ekâvîlin cümlesinden Hz. Ebû Tâlib Mekkî’nin kavli Kûtü’l-Kulûb’da semâ’ın ibâhatini cemâat-i sahâbeden nice kimselerden nakl eyledi. Ve ehl-i sünnetten dahi nice kimselerden nakl eyledi. Pes buyurdular ki; Ashâb-ı kirâmdan Abdullah b. Câfer semâ’ eyledi. İbn-i Zübeyr ve Muǧîre b. Şû’be ve Muâviye etmediler. Gayrleri semâ’ eylediler. Ve dahi Ebû Tâlib Mekkî buyurur ki; bu fiili işlediler seleften çok kimseler, sahâbe-i kirâm hazerâtından ve tâbiînden. Ve Ebû Tâlib buyururlar ki, dâimâ Hicâziyyûn bizim katımızda Mekke’de semâ’ istimâ’ ederlerdi, efdal-i eyyâmda, eyyâm-ı teşrîk gibi günlerde ve ba’zı eyyâm-ı sürûrda.Ve ehl-i Medîne dahi ehl-i Mekke ile semâ’ üzere müdâvemet ve müvâzabet eylemeden hâli’ olmadılar ilâ zamâninâ hâzâ. Ve Ebû Hasan Askalânî evliyâullahtan bir kimsedir, semâ’ ederdi. Ve kemâl-i veleh ve izhâr-ı şûriş ederdi. Ve bu semâ’ hususunda bir kitâb tasnîf eyledi ki, ol kitâbda semâ’a münkir olanları reddeyledi. Ve kezâlik evliyâullahtan nice cemâat semâ’ hususunda nice kitaplar tasnîf edip münkir-i semâ’ olanları reddeylediler (Arpaguş 2007: 388).