Eserden Örnekler

İstanbuldan Azîmet

Bin iki yüz doksan dört senesi Receb-i Şerîfinin ilk penc-şenbe günü Der-Âliyye Limânında lenger-endâz olan Lyold Kumpanyası vapurlarından birine râkiben Hindistâna azîmet olundu. Yaz mevsimi olduğu cihetle ekinler ve çayırlar ile reyyân ve handân olan sevâhil ve adaların manzara-yı latîfelerinden duyulan inşirâh-ı derûn kâbil-i ta’rîf değil idi. Vapûr yolda ba’zı adalara ugrayarak yolcu ve eşyâ dengi alıp verdikten sonra doğru İzmire gidip yeni inşâ olunan rıhtımın duvarına âdeta bir kayık gibi yanaştı. O gün nısfu’l leyle kadar İzmirde lenger-endâz olup Çeşmedeki sulara gitmek için vapûru Çeşmeye uğramak üzere istikrâ etmiş olan bir çok çoluk çocukları ile berâber erkek ve kadın İzmirde bulunan Avrupalı familyaları gece beş râddelerinde vapûra doldular. Bunlar geldikten sonra gece sabâha karşı vapûr kalkıp doğruca Sakız Adası pîş-gâhına ve oradan Çeşmeye giderek ve yolcuları hemen çıkararak yola revân olup bir haylîce gittikten sonra istikâmet değiştirerek Leros Adasına yanaştı. Mezkûr adanın sekenesi ticâretle te’ayyuş eder takımdan olduklarından İskenderiyye ve Bombayda bulunan adamlarına mektûp ve eşyâ’ dengi göndermek için mezkûr Lloyd Kumpanyasının Bahr-i Sefîde giden vapûrlarını adalarına uğramak üzere bin beş yüz liraya kirâ’lamışlar imiş. Vapûr orada birkaç sâ’at durup eşyâ’ ve mektûp verip aldıktan sonra o civârda bulunan Kalimnos ve İstanköy Kos Adalarının aralarındaki boğazdan İskenderiye cânibine gitmeye gitmeye başladıkta bir azîm sallantı peydâ olup şehr-i mezkûr limanına vâsıl oluncaya değin bir haylîce sıkıntı çekildi. O gün gecesiyle berâber giderek sabâh kuşluk vakti İskenderiyye Limanına vasıl olduk […] (Hürmen 1995: 10-11).