Eserden Örnekler

İy meh-i nâ-mihrbân âvâre kıldun gönlümi
Hecr ile bî-sabr idüp bî-çâre kıldun gönlümi
Fürkatün sahrâlarında dem-be-dem Mecnun bigi
‘Aklumı zâ’il kılup gam-hâre kıldun gönlümi

İy boyı ok bigi mevzûn kaddümi yâ eyledün
Kirpügün hecriyle beni bî-ser ü pâ eyledün
Sen nigârâ hâtırun hoş tut ki ‘ışkunda benüm
Cümle-i eşgâlden gönlüm tesellâ eyledün

İyi güzel yüzlü habîbüm kim yüzündür hâldâr
Çâk çâk itdi yaşum seyli yüzümi hâk-vâr
Fürkatünden oldı gözüm yaşı eşk-bâr
Belki her bir çeşmüm oldı ‘ayn-i bahr-i bî-kenâr

Nice bir içüresin ‘uşşâkuna hûn-ı ciger
Nice bir derd-i dil ile kılasın zîr ü zeber
Nice bir sâkunda koyup sen huliyy-i sîm ü zer
İdesin halhâl bigi ‘âşıklarun bî-pâ vü ser

Gönlümi mahmûr iden ‘ışkun şerâbı şevkidür
Cânumı hayrân iden la’lün zülâli şevkidür
Sun lebün câmın ki oldur çeşme-i âb-ı hayât
Cür’asınun teşnesi ehl-i mahabbat cavkıdur

Zâhir oldı çün cemâlün nûrı iy hurşîd-rû
Cân u dilden cümle ‘uşşâk eylediler ârzû
Derdmendün bûse-i ruhsârun eyler cüst u cû
Kıl’atâ kim rûy-ı hûba yaraşur hulk-ı nîgû

İy gözi âhû-yi Çin reftâruna irmek rimâh
Ağzunun yarından özge câna yokdur rûh-ı râh
İy yüzi nûr-ı sabâh u tal’atı şems-i revâh
Şâm-ı zülfün tâ’ir-i ervâha olmışdur merâh
…
Dil-rübâlar vasfını ko eyle medhin ihtiyâr
Şol güzîde hazretün kim devletidür pâydâr
Sadr-ı ‘âlî sâhib-i cûd u büzurg-i nâmdâr
Kim şi’âr-ı kadrine konmaz gubâr-ı neng-i ‘âr

Seyyid-i rûşen-nihâd u fahr-i sâdât-i bilâd
Nâsır-u ehl-i salâh u kâhir-i ehl-i fesâd
Maslahat vaktinde rây-ı pîşvâsı pür-savâb
Memleket zabtında fikr-i reh-nümâsı pür-sedâd
…
Âsmândan yire yağmur yağmaz ise gam degül
‘Âleme yiter ‘âtâsı yalunuz âdem degül
Bir mürüvvet kânıdur kim dest-i gevher-pâşınun
Bahşişi katında deryâ katre-i şeb-nem degül

Düşmenün rağmına dâ’îm devletün bâkî ola
‘Îş u nûşun meclisinde ay u gün sâkî ola
Gündüzün ‘îd-i sa’âdet-bahş gicen kadr olup
Lutf-ı Yezdân ‘azze şânuh hâfız u vâfî ola (Saraç 2021: 99-104)