Eserden Örnekler

Gazel

Üç adım oynar ol meh tüngülür sahrâda ceyrân tek

Eder bâzî fezâ-yı sebzde kebk-i hırâmân tek

Perîveş gayb olur tâ kefş-i evvel kefş-i sânîden

Görünmez çâpügünden gülle-i can-sûz-ı şeşhân tek

Koyardım çeşmimi kefşe bedel ammâ nezâketden

Bilirdim pâyine kirpik batar hâr-ı mugaylân tek

Göze tüngülmede çamranmış olan sâk-ı berrâkı

Fürûg-ı sür‘atinden görünür bir berk-i rahşân tek

Üç adımda ne pek çâpükdür isterse bir adımda

Erişir şarkdan garba o meh mihr-i dırahşân tek

Kenâr-ı çâyı bâzîgâh edip gelmez bizim suya

Bulanmış göz bulağı Hâssa bu gamdan olur kan tek

Begim beglerbeği tek saff-ı beglerde nümâyândır

Emîrim görünür mîrân içinde mîr-i mîrân tek

O bâzîgâhda hep ceyş-i hûbân saf çekip ammâ

Livâ-yı kaddile peydâdır ol meh safda sultân tek

Döner yorulmadan tâb-ı hevâdan âteşe rengi

Akar hâke düşer ter ‘ârızından âb-ı hayvân tek

Yel esdi etme bâzî korkulur kim cünbiş-i yelden

Nezâketten kırılsın mû-miyânın şâh-ı reyhân tek

Yüz adım tîg-i fikrim sebkat etmiş Fâ’izâ senden

Üç adımda güzeller zümresinden pây-ı hûbân tek  (Terzibaşı 2008 C. 3: 33).

Gazel

Menim mânend-i def tâ postum içre üstühânım var

Elinden ey mugannî-beççe her sâ‘at figânım var

Fedâ-yı çeşm-i bîmârın hınâ-yı pây-ı nâzındır

Eger bir nâ-tüvân cânım ü ger bir katre kanım var

Temâşâgâh-ı merdümdür ayak bas merdüm-i çeşme

Gel ey rûh-ı revânım gör ne hoş âb-ı revânım var

Zekan sîbiyle şeftâlû-yı leb der-rûz u şeb ağlar

Çocuk huylu dil adlu sînede bir nâ-tüvânım var

Sabâ şeşhâne tâbûrunda benden söyle ol şûha

Nişân-ı gülleye lâyık hele çok üstühânım var

Nişândır dil tüfengin nârına zahmın nümâyândır

Gam âlâyında sâhib-rütbeyim Fâ’iz nişânım var (Terzibaşı 2008 C. 3: 51).