Eserden Örnekler

Gazel

Ravza-i pâkün temâşâgâh-ı Mevlâ’dur senün

Hâb-gâhun cennet-i alâ-yı hüveydâdur senün

Bûsegâh-ı ins ü cindür âsitân-ı devletün

Hâk-i pâyün tûtiyâ-yı çeşm-i amâdur senün

Pûte-i fikrümde yokdur ğayrı kimyâdan eser

Nazra-i iksîr-i lutfun dilde kimyâdur senün

İftihârı leyle-i mirâcun olmuş nüh felek

 Makdemün revnak-fezâ-yı arş-ı alâdur senün

Sâye-i çetr-i şefâatde gözet rûz-ı haşir

 Rahmeten li’l-'âlemîn zâtun müsemmâdur senün

 Rû-siyâh kehf-i deründe Kâmî kıtmîrün meded

Afv kıl taksîrini 'aşkunla şeydâdur senün  (Arslan 2018: 145).

(Gazel)

Mekteb-i irfânda gördüm bir güzelKurân okur

Hoş-edâ şîrîn-sadâda sûre-i Rahmân okur

Pîş-i üstâda edîbâne olup zânû-nişîn

 Nâz u işve dersin ezber eylemişdür ân okur

Gerdeninde hâlleri semmûr-Hindî nüshası

 Gamzeler seyfe dayanmış lebleri mercân okur

Nev-civânum câmı/Câmî almış destine mestâne-vâr

Gülsitân-ı nahve sarf eyler ömr-i bûstân/ Bostân okur

 Şeh-suvârum nâz u istiğnâda Kâmî yekke-tâz

Hüsn ü ânı zümre-i dilberlere meydân okur  (Arslan 2018: 204).

(Gazel)

Biz metâ'-ı vasl-ı yâre cânı kıymet virmişüz

Sûk-ı bâzâr-ı mahabbet içre şöhret virmişüz

Çün devâdan geçmişüz bârî füzûn it derdümüz

Biz tabîb-i hikmetüz dermâna ruhsat virmişüz

Âh kim nâz u niyâzum mûcib-i lutf olmadı

Hâtır-ı cânâna biz beyhûde zahmet virmişüz

Çeşmine teklîf-i resm-i mey ider sâkî yine

Nûş-ı câm-ı işrete bizlerse nevbet virmişüz

Hân-ı vasl-ı dil-rübâ firkatsüz olsa bî-nemek

Ol sebebden Kâmiyâ hicrâna ruhsat virmişüz (Arslan 2018: 224).