Eserden Örnekler

Nesr: Fakîrden bazı mürîdanımız tasavvufa müteallık bir risâle taleb (6) itdiklerinde her ne kadar tasavvufun tarifi terkü’d-deâvî ve kitmânü’l-meânî ise de El-ulemâu veresetü’l-enbiyâ hadîs-i şerîfi medlûlunca enbiyâ-i izâmu’s-selâmın usûl olup ulemâi bi’llâh ve ârifân-ı âgâhın fürû‘ oldukları mütâlaasıyla berâber Ve emmâ’s-sâili felâ tenher ve emmâ bi ni’meti Rabbike fehaddis âyet-i kerîmesi ve şifâ-i şerîfin ibtidâsında vâki’ min Men suile an ilmin feketemehu elcemehu’llâhu bilicâmin min nârin yevme’l-kıyâmeh hadîs-i şerîfi tefekkür ve Hazret-i Ali kerrema’llâhu vechehu efendimiziñ Lâ hayre fi’s-samti ani’l-‘ilmi kemâ lâ hayre fi’l-kelâmi ani’l-cehl eser-i âlîleri tedebbür olundukda dirîğ olunamayup

beyit:

Veccehtu ilâ bâbuke yâ Hazret-i Mevlânâ

Li-erâdu’l-ehzâbuke yâ Hazret-i Mevlânâ

medlûlı üzere Pîrimiz Hazreti Mevlânâ Celâleddîn-i Rûmî efendimizin rûhâniyet-i kudsiyelerinden istimdâd ve ruhsat-ı niyâz eyleyerek işbu risâlenin tertîbine şürû’ ve mübâşeret ve Ta’rifü’s-Sülûk tesmiye kılındı. Cenâb-ı Feyyâz-ı Mutlak itmâmını ihsân buyursun. Amîn. Nezd-i erbâb-ı basâyirde bedîhî ve bâhir ve hazret-i server-i enbiyâ etemmü’t-tahiyye efendimiziñ esdaka kavlu Lebid Elâ küllu şey’in mâ halellâha bâtilu buyurmuş oldukları delâlet-i vâzıhasıyla zâhir oldığı üzere mümkinu’l-vücûduñ kıyâmı vâcibu’l-vücûd ile olup vâcibu’l-vücûdsuz tasavvur olınan vücûdun ma’dûm şu cihetle Leyse fi’d-dâri ğayruhu deyyârun müfâdınca enzâr-ı ulu’l-ebsârda vücûd-ı mâ-sivâ me’ana hâlikun olarak görinen bir sûret-i mevhûm… (Edirneli Hayri 1276: 6-7).