Eserden Örnekler

                         Gazel

Zât-ı vahdedden nişândır vech-i pâk-i dil-rübâ

Kavs-i kudretden bedeldir ebruvân-ı meh-likâ

Tîr-i ser-tîz-i kazâdır gamze-i dil-dûzlar

Çeşm-i mahmûr üzre olmuş her biri ayn-ı belâ

Gonceler açmış o nahl-i nev-şüküfte al al

Turresi olmuş o bâğ-ı hüsne bir zıll-ı hümâ

Kâmeti tûbâ-yı vuslatdır hırâmı fitne-hîz

Sâ’id-i sîmînidir şâh-ı gül-i hayret-fezâ

Nâfesinden âhuvân-ı Çîn olalar hisse-çîn

Hırz-ı cân eyler anınçün miski hep bay ü gedâ

Hâsılı bir heykel-i nûr-ı mücessemdir Nebîl

Bî-kusûr anı Hudâ halk eylemiş ser-tâ-be-pâ (İnal 2000: 1573)

                              Tahmîs

                                   I

Açıl ey gonce-i ne’şküfte zeyn et bezm-i gülzârın

Görünce şevke gelsin andelîb-i mest-i dîdârın

Ki sensin şehriyâr-ı devleti bu bâğ-ı ezhârın

Sehâb-ı zülfünü ref’ et görünsün mâh ruhsârın 

N’olur sâyende çeşmi rûşen olsun âşık-ı zârın 

(...)

                                   IV

Kalır mı bâde-i aşkın içenler vâdî-i gamda

Bulur mu zevk-i dîğer olsa da ger meclis-i Cem’de

Sorar mıydı görüp Leylâ’sını Mecnûn bu demde

Aceb Şîrîn’in eyler miydi nâmın yâd âlemde

Egerçi kûh-ken bilseydi şîrînî-i güftârın

                                  VI

Dehen-bâz-ı fesâhatdır nigâhın lâl ü mebhûta

Aceb Îsâ mısın indin semâdan sahn-ı nâsûta

Kalır câdû-yı sihr-âmîzler yanında fertûte

Edersen azm-i Bâbil öğredir Hârût ü Mârût’a

Rumûz-ı fenn-i sihri çeşm-i şehlâ-yı füsûn-kârın

                                  VII

Nebîlâ haddini bil de tecâvüz eyleme haddi

Nazîr olmaz bu şi’r-i pâke işte söz budur ciddî

Olur engüşt-nümâ-yı hayret elbet Hâce-i Vecdî

Yanında mu’teberdir şâ’irân-ı asrın ey Hamdî

Misâl-i kâgıd-ı zer nüsha-i rengîn-i eş’ârın (Kutlar Oğuz 2014: 560-561).