Eserden Örnekler

Bu fakir, mevliden Ahısha ve muvattanen Çorum Kasabası’nda, Şeyh Eyyüb Mahallesi’nde Tarîk-ı Nakşî-i Üveysiyye meşâyıhından Ethem Babazâde İzzet-nâm pür-taksîr. Fıtar-ı tab-‘ı acizi, enbiya-yı izam ve evliyâ-yı fiham hazerâtına kesret-i muhabbet ve vefret-i rağbetim olduğu cihetle, iki yüz elli beş tarihinden ile’l-ân bi-hasebi'l-kader seyahat ve geşt ü güzâr eylediğim memâlik-i İslamiyye'de enbiyâ-yı izamdan Ergani Sancağı’nda Hazret-i Zülkifl aleyhisselam merkad-ı şerîfiyle Tarsus'ta Hazret-i Lokman ve Danyel aleyhimesselam makam-ı latiflerini ve Ashâb-ı Kirâm’dan Dersaâdet’de Hazret-i Hâlid bin Zeyd ve Ca’fer ve Âl-i Beyt'ten Kayseri'de Zeynelabidin ve Tâbi‘în'den Sivas'ta Abdülvehhâb Gazi radiyallahu ‘anhüm hazerâtıyla evliyâ-yı kirâmdan belde-i mezkûrelerde ve bilâd-ı sâirede nice zevât rahimehumullah makâbir ve makâmatlarını ziyâret müyesser olduğu gibi, bi-hamdillahi Te‘âlâ, eltâf-ı İlâhî'den olarak sâye-i inâyetvâye-i cihandâride hizmet-i müftehire-i fırâşiyyet-i Ravza-i Mutahhara-yı Cenâb-ı Nebeviyye’ye, bâ-berât-ı âlîşân nâil olunup hıdmet ve vazife-i ma'n(ev)iyemiz dahi ol makam-ı mübarek mücâvirlerinden bir zât tarafından bi’l-vekâle rü'yet ve îkasına muvaffâkiyyet-i âcizânem olduğu halde, Çorum Kasabası’nda defin-hâk-ı ıtırnâk olan Ashâb-ı Kirâm ve evliyâ-i zevi’l-ihtiram hazerâtının makâbir ve makâmâtı şerîfleri vakt be-vakt ziyâret olunarak mütevellî ve mutasarrıfları yedlerinde bulunan berât ve vakfiyelerinde mutâla‘ası ve ba'zan dahi mess-i erbâb-ı vukûf zevât-ı sîkât-ı sahihatü’l-kelîmâttan suâl ile muşârün ileyhim hazerâtının nâm ve elkâb-ı şöhretleri ve beyne’l-ehâli mütevâtir olan âsâr ve hâssiyyet ve menâkıblarına alâ kaderi'l-imkân kesb-i ıtlâ' eylediğim cihetle işbu risâlede nâm ve makâm-ı mübareklerinin cem-‘i telfîfine şurû’ idup (iza tehayyertum fi’l-umûri fe’ste‘înû min ehli’l-kubûr) hadis-i şerîf-i ma-sadakına mazhariyetle mümtaz olan e‘ızze-i muşârun ileyhim hazerâtının hakk-ı fakirîde ve hakk-ı ehakk-ı Ümmet-i Muhammedî’de enfâs-ı kudsiyye ve ruhâniyye-i latîfeleri fuyûzâtını isticlâb ve istişfa’ ümidinde bulundum. Ve “Tezkire-i Makâmat” nâmıyla tevsîm eyledim. …Ve minallahi’t-tevfîk ve Hüve ni‘me’r-Refîk (Ali İzzet 1315: 3-4).