Eserden Örnekler

Ez cânib-i cenâb-ı emîn bâb-ı sa’âdet Gazanfer Ağa-yı behcet amme-i muazzama-i şehriyâr-ı Îrân-zemîn Abbâs Şâh-ı Safevî nüvişte-şod Tâ ki bânû-yı tâbende-rûy-ı mihr-i enver ve rütbetü’l-hicâl-i ferhunde-fâl-i devlet-serâ-yı hâver miyân-ı eyvân-ı sipihr-i ahzar ve gurfât-ı buruc-ı isnâ aşerede hezâr izzet ü ikbâlle cevelânger ve bî-şumâr şevket ü iclâlle cilve-güster olup mahfil-i izzet [?] duhterân-ı ahter-i müterakkıb-ı fermân-ı serîü’l-cereyân-ı ferhunde-fer ve pîş-gâh-ı devlet-penâhında mutrib-i nâ-seyyid-i hoş-peyker ki dâire-i bed-rûke-i çeng-i hilâl ile tarab-sâz olmak mukarrer ola. Hemîşe ol mihr-i âlem-ârâ-yı sipihr-ismet ve neyyir-i ziyâ-bahşâ-yı cihân iffet, şem-i bâhirü’n-nûr-ı dûdmân-ı şâhı rükn-i kaviyyü’l-bünyân-ı hânedân-ı cihân-penâhı kûh-ı pür-şükûh-ı iklîm-i ikbâl, deryâ-yı fasihü’l-ircâ-yı hıtta-i iclâl gurre-cebîn-i şehriyârî dürre-i iklîl-i tâcdârî, Züleyhâ-talat, Meryem-nezâhet, Belkıs-ı serîr-i Kaydafe-tedbîr dil-şâd-vâr-ı Îrân, düht-nihâd-ı sâniye-i râbia-dânâ reh-siper-i Fâtımatü’z-Zehrâ, nûr-ı hadikati’l-eyâleti’z-zâhire nûr-ı hadikati’l hükûmeti’l-kâhire, kıdvet-i muazzamati’l-izzeti’l-hayderiyet ve umdethâ-yı nizâm-ı mühimmâti’d-devleti’l-Abbâsiye ve behcetiyâ mehd-i a’zâm-ı Meryem-eyyâm u Belkıs-zamân, hazer-i a’lâ-ismet-i dünyâ emân-ı rüzigâr-ı medd-i zıllhâ alâ müfârıki’l-enâm ilâ infisâm silsiletü’l-leyâlî ve’l-eyyâm hazretlerinin vücûd-ı mes‘ûd-ı bedîi’s-simât ve zât-ı hüceste-sıfât-ı mekârim-(67b) âyâtları mesned-ârâ-yı tarab-serâ-yı kâmrânî ve revnak-efrûz-ı mihr-i ferhunde-ahd-i cihâniyânı olup evkât-ı fâyizetü’l-berekâtları tedbîr-i mühimmât-ı salâh-ı âleme masrûf ve zimâm-ı himmet-i kadr kudretleri cihet-i âsâyiş-i benî âdeme matûf olmağa kâffe-i harekât ve sekenâtları muvâfık-ı takdîr-i bî-tagyîr-i Sübhânî ve âmme-i halvât ve cilvâtları mukârin-i te’yîd-i pür-tesdîd-i Rahmânî ola. Şi’r ve hâzâ duâ-i lâ[…] Salâhü’l-âsâfi’l-beriyye şâmil-i gabb ü es’adü’s-su’ûd ve leyâlî ve eyyâm-ı vâsıtai’l-ıkd-ı şehvâr ve a’vâm olan eymen-i evkât ve es’ed-i mesâ’atda name-i bedîü’l-üslûb ve mülattıfa-i inâyet- mashûbları vâsıl u şeref-i vusûlinden gâyet-i server-i nihâyet-i cevr hâsıl oldı. Hakkâ ki leyletü’l-kadr-i sevâd-midâdı feyz-bahşâ-yı dil ü cân ve sabîhati’l-ıyd-ı beyâz-ı turfa-nihâdı revnak-efzâ-yı âlemü âlemiyân olup heykel-i zîbâsı bir şem-i kâfûrîdir ki fetâyil-i anberîn-sutûr-ı güzîn ile münevver kâşâne-i bâl yâ asâ-yı Mûsâ’dur ki hayye’l-cibâl-i sihr ile derûnı mâl-â-mâldır. (Nâdirî Münşeat, Şevket Rado Yazmaları 33/2, 66b-67b.)