Eserden Örnekler

Yıldırım Bâyezid’in Kızı Hundî Hatun’un Emir Sultan’la Nikahlanması

Bade zaman şuhûr-ı adîde ve sinîn-i medîdeden sonra padişah-ı İslam ve’z-zamân Sultân Bâyzeid Yıldırım Hân Edirne cânibine gazâya sefer eyleyücek seferde iken pâdişâhun sülbi kızı Hundî Hâtun bir gice saray divârlarını aşup gelüp sultân hazretlerinün hücresi kapusını açup içerüye girdikde sultân hazretleri: “Kimsin ne kimesnesin ve niye geldün?” diyü suâl eyledikde “Ben pâdişâhun kızıyın sana geldim ki Allah emriyle beni alup helâl idinesin” didikde sultan hazretleri buyurur ki: “Biz bunda pâdişâh kızın almağa gelmedik. Var cânım evinüze git aybdur” diyü nice defa men ve red eyledikde aslâ ve katâ men ile memnû olmayıcak buyurur ki: “Var imdi bir müsülmanun evine var. Sabah olsun nikah olunsun” buyurduklarında bir müsülmanun evine varur sabah olıcak nikâh ederler. Helâl idinüp aldıkda saray kapusından pâdişâha bir kimesne varup arz ider ki “Kızınuz bir gice kaçup bir zelîl fakîr hor u hakîr kimesneye vardı” didikde pâdişâh dîvân çavuşlarından yedi kimesne gönderir ki “varup ikisin dahi katl idesiz” diyü. Mezkûr çavuşlar kaplucaya geldiklerinde sultân hazretlerine haber virirler. Asla iltifat eylemez. Gelüp Yıldırım altında çaya geldiklerinde nice cemaât-i kesire ve akvâm-i vafîre seyr u temâşâya çıkıcak gök yüzinden yeşil yeleklü oklar nâzil olup çavuşların bazısını helâk idüp bazısı kurtuldukda acâyizden bir karıcuk gelüp “Sultânum benim iki oğlancıklarım ancak temâşâya çıkmışlardır Size su-yı kasdları yokdur. İnayet edüp kıyman” didükde buyurur ki “Anlar bizi temâşâya çıkmışlar, Hak Teâlâ anlara bir hâl virsün ki cemî-i âlem anları temâşâ eylesünler" didklerinde anlar kadîd olurlar (Uğur 2013: 135-136).