Eserden Örnekler

Münâcât Be-Kâdî-i Hâcât

Ey Rabb-i arş-ı a’lâ

Yâ Rabbenâ zalemnâ

Ey vâhid ü tüvânâ

Yâ Rabbenâ zalemnâ

İtdüm şüru fıska

Gözim de vardı sıdka

Nefsim de geldi nutka

Yâ Rabbenâ zalemnâ

İçdüm nebîz temri

Belki müdâm hamrı

Bildüm harâm ü zehri

Yâ Rabbenâ zalemnâ

Malumun oldı hâlüm

Âsî vü pür-melâlüm

Bî-add benüm vebâlüm

Yâ Rabbenâ zalemnâ

Hep bende cürm ü noksan

Senden efendi gufrân

İhsân senden ihsân

Yâ Rabbenâ zalemnâ

İsyânum oldı efzûn

Nefs oldı gerçi memnûn

Defter günahla meşhûn

Yâ Rabbenâ zalemnâ

Sâmil hatâda her bâr

Sensin Rahîm ü Gaffâr

Lütfundan itme nâ-çâr

Yâ Rabbenâ zalemnâ 

Târîh-i Cülûsiyye Berây-ı Şehenşâh-i Ümem Abdü’l-Mecîd Hân-ı Nâzımü’l-Âlem

Hidîv-i Cem-sipeh Abdü’l-Mecîd Hân dâver-i devrân

Binâ-yı şevketi dâim ola turdukca bu dünyâ

Taşırsa çarh Sâmil başda târîhim sezâ el-Hak

Cülûsın sa’d ide Abdü’l-Mecîd Hân bu dem Mevlâ (1255)

Gazel

Hüsnünün bâğında gördüm hûb bir hat bir de zülf

Sünbül ü şebbû gibi mergûb bir hat bir de zülf

Gör benefşe hattını kokla saçından feslegen

Çâr-ebrû tâzeden matlûb bir hat bir de zülf

Biri iki yüzli kâfirdür biri ejder-likâ

Mülk-i dilde şimdicek âşûb bir hat bir de zülf

Avrupa perçemle bir nev-hatta düşdi gönlümüz

Levh-i endîşemdedür mektûb bir hat bir de zülf

Her zülf-i dilbere bin cânla dil-besteyem

Sâmilâ indümde pek mahbûb bir hat bir de zülf (Batur vd. 2020: 451, 458, 485).