Eserden Örnekler

Na’t-ı Resûl ‘Aleyhi’s-selâm

Zebân-ı kilkim olunca güher-nisâr-ı şeref

Olur sühan güher-i gûş-ı iftihâr-ı şeref

Eger ser-i kalemim olsa katre-rîz-i midâd

Olurdu noktası hâl-i leb-i ‘izâr-ı şeref

Kümeyt-i hâmeme oldukça ruhsat-ı cünbîş

Eder bu sâha-i ma’nâyı pür gubâr-ı şeref

Sürûd-ı sâmi’a zîb-i sarîr-i kilkimdir

Sadâ-yı mutrib-i ser-bezm-i i’tibâr-ı şeref

Resîdedir kalemimden riyâz-ı ‘âlemde

Şükûfe-i çemen-i feyz ü berg ü bâr-ı şeref

Çekîdedir o zülâl-i sühan ki hâmemden

Olur hadîka-i âfâka çeşmesâr-ı şeref

Bu gûne nakş-ı mübâhât u ibtihâcı n’ola

Nümûde eylese kilk-i suver nigâr-ı şeref

Kemîne ‘abd-i senâ-hânıdır hemîşe eder

Medîha-sencî-i evsâf-ı şehriyâr-ı şeref

Bülend-pâye cenâb-ı Muhammed-i ‘Arabî

Sipihr-i a’zam-ı dergâhıdır medâr-ı şeref

Şeh-i gürûh-ı rüsül yekketâz-ı sahn-ı kemâl

Zahîr-i leşker-i İslâm u şehsüvâr-ı şeref

‘Azîz-i taht-nişîn-i kalem-rev-i ikbâl

Ki midhatiyle eder hâme kesb-i kâr-ı şeref

Şehinşeh-i haşem-ârâ-yı kişver-i melekût

Ki nâmına okunur hutbe-i diyâr-ı şeref

Yegâne şâh-ı serîr-i kerem ki olmuşdur

Vücûd-ı eşrefi bâdî-i iştihâr-ı şeref

Hıdîv-i ‘âlem-i ‘ulvî Resûl-i bâ-temkîn

Ki intisâb makâmıyladır vakâr-ı şeref

Huceste nahl-i ser-efrâz-ı ravza-i rahmet

Ki pây-bûsunu etmekte cûybâr-ı şeref (Esir 2013: 110-112).

Gazel

O mehe figân u âhım eser eylemez mi âyâ

Bu esîr-i şâm-ı hicre nazar eylemez mi âyâ

Reh-i bâg-ı kûyu üzre tenimi gubâr etdim

O civân-ı serv-i kâmet güzer eylemez mi âyâ

Dil-i zâr bülbül-âsâ bu kadar figânlar eyler

O güle nesîm-i hoş-dem haber eylemez mi âyâ

Bize dâmen-i cefâsın yine vakf-ı cünbiş etdi

Felek âteş-i dilimden hazer eylemez mi âyâ

Göricek bu şi’ri Sa’dî yine kân-ı nazm olanlar

Bu zemîn-i nevde bezl-i güher eylemez mi âyâ (Esir 2013:145).